Mark 10

Yesu Woi Dna Aɓo Nya-nya Gbe

1Nnavun Wa fa Kafanahum U Wa lo Yahudiya kni n Urdun ʼla yi. Aza a yezhi n mwa shi ɓa zhin ɓa shin zhin, Wa wu ɓa nya shi Wo shin wu. 2A Farisawayi ho aɓe ɓa nya Wo ge, “ho ɓa ye ge a wu mula?” Ɓa ɓei nya Wo lonu ntuge ɓa pyi Wa gam nu. 3Yesu wa nya ɓage, “Musa ɓo da gena tu mulawu tukwa?” 4Ɓa ci ge, “Wo ɓei gna ge kwo to zhin ɓo nukwoyi num, sai dei za ku wasika mula wu nya ka wa ga wo nyikwo.”

5Yesu wa nya ɓage, “Knihin nu ɓei zhin Musa wa da lonuʼa?” Mi ɓa gna fye nya kwo ɓei zhin wa da lonu. “Ntu fya bugba nukwoyi kala kpe ɓonu. 6– 7Ama kwoto zhin Shekwoyi zokwo num. Tunyi sapa, Wo ɓei zhin zanu-gbai n nyikwozayi ɓa sase nyalo-nyalo nu n knusun dna mula, ntu cenu eza ɓa fa wo dada n wo ʼya yi, 8Wa nyima wo nyikwo n lonu, ɓa to shan aza gnu aba nu zhin m, ama gmanyi. 9To ʼza gna nyaje n Shekwoyi la cigyidom.”

10Nnavun, sanu ɓa ɓei fi Wa bara yi n puwa ho, ɓa je ɓe n ɓeda yi tu mulawu tukwo.

11“Wa gna ɓa ge sanu ʼza yawo nyikwo wa lado, wo ku anagbai zhin n wa ba. 12Nyikwoza ce nwa ya wo ɓa, wa se ʼzado, wo ku anagbai zhin.”

13Nsa doho yi, Anyikwoza ɓe n ɓa ɓiyi n na bai Yesu wa tuba anabarka, Owa bara ɓa nya ɓa ya ge ɓato gna Yesu gna-gna m.

14Ama sanu Yesu ɓei gye ɓo ɓa zhin, to ca dawo m, Wa ci ɓa ge, “Fye fa aɓi nawyi ɓa ɓe Ma ba, gama Shekwoyi bemi zhin ɓa nya nu. Fye to nya ɓa yam. 15Ɓehin-hin nu n Mi gna fye, eza nwo to ɓe Shekwoyi aba ngye ɓi m, ata ye ge wo lo Wo bemin.”

16Nnavun, Wa kpa bwa na ɓihi tukwo Wa tuba anabarka.

17Sanu Wo ɓei lakala, ʼza doho wa ɓe woi busi wa cha kwo-kwo shi n Wa bye wa nya Wo ge, “Male Manayi mi ɓa zhin knihin nu ma lo sheʼa?”

18Yesu anya wo ge, “Kninu zhin hoi yi Mi Manayiʼa? Shekwoyi gmanyi nu zhin Za manayi. 19Ama ɓeda n ha nya Mi nyi, ho kpe a wyidna ye lo nge to wu zam, to zhin anagbayim, to ha wyi vim, to ha ceakatam, to ha gyi za fyim, ha ga ho dada mwa-mwa n ho ʼya yi.”

20Zahi wa ci ge, “male, mi shi ɓa bwa vinya, mi to bma doho ya n ɓa min.”

21Yesu wa wo yeye dnagmai ho tu wo ɓo, Wa ci wo ge, “Nya gmanyi n hoi celo. Lo ho knu ho nyabwa vinya, ha ca gyiwye ha gna a wyekwoyi, ha so ho nyabwa dna n ʼshe, ha ɓe ha vi Mi.”

22Owa wyeba shando n sayi-sayi, wa lo wo nya to cei dawom, ntuge wo ɓei zhin nyabwayi dnagmai nu.

23Yesu wa shiwo awye shi wo lo, Wa bmiya wye Wa ci Wa bara ge, “Kwo po ɓedna lo nyabwayi wa lo Shekwoyi bemi.” 24Ca woɓa mwa. Yesu wa je ɓa gna: “Ema ɓi yeyeyi, kwo dnaɓo lo eza nwo bugbai shi n nyabwa ba, wa lo Shekwoyi bemi. 25Kwo gna dulo n sauci lakumi kwa Idu na ci buawye, aya cige nyabwai wo lo Shekwoyi bemi.”

26To Wa bara ga ɓedayi gaiciyam, ɓa nya Wo ge, “Ngye nlonu, nyikado nu ɓa shan pwo na nyi ye nto na nyabwai yi nun ma?”

27Yesu wa shiɓa wye zun, Wa ci ɓa ge, “Ntna Shekwoyi, ko ta wo zhin m. Ama n Shewoyi aba, nyahonyahoi to dna ɓom.”

28Bitrus wa ya anya yeyi n wo, n woabara jeyi nku ya ntu Wo ɓo wa cige, “Yi ku anya fa vinya n nabai ya vi Ho.”

29Yesu wa ci ɓa ge, “Wuye Ma gna fye ɓehin-hin eza to lo n wa fa nyaho-nyahoi kwo apyi, owaje, owoamapwi, owoʼya, owo dada, owo aɓi, kwo owo akaya ntu Mi yeye ɓo, har wa gna azaje nabari manayi 30Nwo ta gwo gyiba abwa tagyim, tu nwo puwa, owo aje, owo amapwi, owo ya, owo aɓi, owo kni, nwahala sin yi. Anya deye vinya ɓa zhin wo nya nu, dna na ʼnyi ye n anyi ɓa ɓe lo nyi, njesun wo ɓa bwa wye-wyei nyalo-nyalo nya. 31Ama nmwa begye na gye ge ɓa zhin aza yakwo nsaiye, ɓa ɓei ku ze aza gbagbayi n bwayi. Aza na gye ge, ɓa to zhin nyaho nu yam, ɓanu ɓei zhin aza yakwo n bwayi.”

Yesu Wa Da Wo Fi Bo

32Ɓa pmi ɓa lo Urushelima Yesu yi gyi n ɓa bye. Owo abara yi viwo navun, edna ku wan ɓa, Wa lo n ɓai n sepa gmanyi, Wa ya ɓa gna nya n kwo ɓa bwa Wo sanu ɓa si Urushelima.

33Wa gna ɓa ge “Esa yi si ɓo, Emi, Kristi, aɓa wan Mi alo n Miyi n Pirist tukwoda ba wa da Mi efyi wa, wa ga Mi n na Romawayi a knu ɓa wu Mi. 34Ɓa ɓa kpema gye, ɓa kni akni kpe Mi, ɓa gbe Mi ya n ɓa knarufin yi, ɓa wu Mi. Ama n na nyipyei gnu ata avun, Mi ɓa lakala n vingwo.”

35Yakubu, n Yohana yi, Zabedi aɓi, a ɓe ɓa daɓo Woi san-san ɓa ci Wo ge, “yi ye Ha bmayi zhin.”

36– 37Yesu wa nya ɓa ge, “Kni do na?” Ɓa ci ge, “Yi cei pmalo yi ye sase viviyi n Hoi n Ho bemi. Zaknayi n Ho bwai-zhe, zaknayi n Ho bwapmi.”

38Yesu wa ciɓa ge, “Fye takpe nya ye lo nfye nyam. Fye ɓa mi fya sin dna Mi kofi liliyi wahala nya n Mi ye Ma sin nyi? Ko a zhin fye batisma n batisma azhin nya yi nkwo zhin tilas Ma zhin nyi?”

39Ɓa ci ge, “yi ɓami.” Yesu wa ci ɓa ge, “Fye ɓa sin dna n Mi kofi azhin fye batisma n Mi batisma yi, 40ama Mito iko yi lo Ma kpe fye viviyi n Ma sese bayi m, n Mi bemi m. A ku ko shiri lu zhin.” 41Sanu Wo abara je ɓei kpe ɓe ye n Yakubu n, Yohanna yi ɓei nya, ɓa gyi minagyi. 42Yesu wa yiɓa Wa gnaɓa ge, “Fye kpelo ge asu n na ʼza yakwoyi na nyi, ɓa wan za sun, 43Ama kwo wulo gbo n fya ba. Zanu n wo ye wa zhin zayakwo n fye mi, tile wa zhin fye bara. 44Eza n wo ye wa zhin zayakwo vinya, dole wa zhin aza bara vinya. 45Ntuge kwo Emi hin, Kristi, Mi to ɓe a zhin Mi bauta num, ama Ma bma aza zhin Ma gami wye-wyei ntu na za gni-gni ɓo.”

46Ɓa ku si Jeriko. Ɓai knuya nu n ʼzhi, aza n mwa begye ɓai viɓa. Nyaɓai ho wyebuayi, ai yiwo ge Batimawus (Timawus ɓi) ɓei sase shi n zokwo gbe, Yesu yi diya.

47Sanu Batimawus ɓei wo ge Yesu diya lo, wa ya wyi ɓe, “Yesu, Dawuda Nugun, gye mi sun-sun.”

48Aza ciwo ge, “La ce pyi!” Ama wa gna wyi ɓe-ɓe. “Aya, Dawuda Nugun, gye mi sun-sun!”

49Sanu n Yesu ɓei wo, Wapi gni n zokwo, Wa ci ge Gna wo ge wo ɓe ya. “Laka ha dagma, wo yi ho lo.”

50Batimawus wa she wo je kwokwoyi ya, wa gmigna, wa lo Yesu aba.

51Yesu wa nyawo ge, “ho ye Ma zhin ho kninya?” Wyebuayi wa ciwo ge, “Aya, Male, miye ma gye wyeba.” 52Yesu wa ciwo ge, “Oho gaiciya ga la ho kagna.” Nsayi-sayi yi, wyebuayi wa gye wyeba, wa vi Yesu lo n Zokwo yi.